सोनिगलय स्याटेलाइट सिटी छगू आपराधिक योजना
सर्वसाधारण जनताया छेँ बुं थायबाय लाकाकया अमिगु थासं पितिना मोटर वनीगु ततब्यागु लं दयेका काठमाडौ उपत्यका विकास प्राधिकरणं यानाचोंगु अमानवीय हर्कत पनते न राज्य न गुगुं राजनैतिक पार्टी वा न सुं राजनेता हे न्ह्यने वगु खनेदत । सर्वसाधारण जनतायात बिचल्लि याना थुमिसं विकासया गज्यागु नमूना पेश यायेत्यंगु ख थुइकां थुइके मफइगु खं जूगु दु ।
-- न्ह्यागु हे कर्म, ककुर्म याना जूसां थोहे काठमाण्डौ उपत्यकाय हे घरजम याना चोनीगु कारणं थौं तक नेपाया गुगुं नं तापागु विकटय चोंगु गांतयसं विकासया अनुभूति याये मखनाचोंगु ख।
-- ५० लाखया जख थेनाचोंगु जनसंख्यायात तकं मागु ल, धया निकास, डम्पिंग साइट, स्वास्थ्य उपचार, सरसफाइ, वायु व वातावरण प्रदुषण नियन्त्रण लगायत छुं हे मानवीय सुविधाया व्यवस्था यायेत बिलकुल असक्षम सरकारं थनया जनसंख्या अझ अपोयेका छगू करोड सोयां चोय थ्यंकल धासा थो सोनिगया हविगत छु जुइगु ख, कल्पना जक यायेत नं थाकुइ धुंकूगु दु ।
-- संसारय अपो धइथें देशय अनया सरकारतयसं अन चोंपिं आदिवासी, मूलवासी, जाति, जनजातितयत उमिगु पुर्ख्यौली लागाय विशेष अधिकार बिया संरक्षण यायेगु नीति कयातगु दइ । सीमा स्वागु जलाखला देय भारतया हे जक दसु कायेगु खसां नं सिक्किमया आदिवासी भोटिया व लेप्चा जातिया जमिन मेपिं सुनांनं न्याये मी मदइगु कडा काननुी व्यवस्था यानातगु दु
-- नेपाल सभ्यताया प्रतिक नेपाल देशया गौरव जुयाचोंगु सोनिगया कला, संस्कृति, इतिहास व सम्पदायात भताभंगु याइगु मेगा शहर व स्याटलोइट शहरत दयेकेगु खतरनाक गुरुयाजेना गुगुं हालतय नं लागू याके मबीत सवर्साधारण नेपाली जनता धासा सचते व जागरुक मजुसें मगागु अवस्था वयाचोगुं दु ।
पुवंक चोसु
सोनिगलय स्याटेलाइट सिटी छगू आपराधिक योजना
थौं सोनिलगय लंय हे न्यासि वने मफइगु जुइ धुंकल । उकिं मनूतयत आ गामय हे लित छोया बीमाले धुंकल ।’ धका नेपाली कांग्रेसया वरिष्ठ नेता रामचन्द्र पौडेलं संसदय न्ववानादीगु खं थौंकन्हय सामाजिक सञ्जालय यक्व हे चर्चाय वयाचोंगु दु ।
कांग्रेसया नेता रामचन्द्र पौडेलं थथे धयाचोंगु हे इलय छता खं छु लुमंके बहजू धासां २०१५ साल लिपा संसदय ल्यया छोया हपिं वा पंचायतकालय राष्ट्रिय पंचायतय ल्यया छोया हःपिं धाये वा २०४६ साल लिपा वपिं सांसद व मन्त्री, प्रधानमन्त्री धाये वा उच्च निसें निम्न तह तक्कया कर्मचारी, नवधनाढ्य, व्यापारी, तस्कर, कालाबजारी, कामदार, भिखारी, न्ह्याम्ह हे जूसां येँय दुहां वयेधुंकल कि सकस्यां थो चीधंगु नेपा गालय हे थगु छेँ छखा दना थ बूगु छेँ त्याग याना, थो हे थाय यात थगु कर्म थलो दयेकेगु यानावयाचोंगु खनेदु । नेता रामचन्द्र पौडेलंनिसें फुक्क धइथें जनप्रतिनिधित गुमित थगु थाय व गांया विकास निर्माण यायेत धका जनतां ल्यया छोया हगु ख, छक येँय दुहांवयेधुंकल कि सुनांनं थ बूगु थासय लिहां वना विकासया ज्या यावंगु खनेमदु । बरु न्ह्यागु हे कर्म, ककुर्म याना जूसां थोहे काठमाण्डौ उपत्यकाय हे घरजम याना चोनीगु कारणं थौं तक नेपाया गुगुं नं तापागु विकटय चोंगु गांतयसं विकासया अनुभूति याये मखनाचोंगु ख।
केवल २२० बर्ग माइल अर्थात ५७० बर्ग किलो भूक्षेत्र जक दुगु सोनिग थेंज्यागु चीधंगु थो लागाय नेता रामचन्द्र पौडेलं धाथें आ लंय मनू हे न्यासि वने मफइगु अवस्था जुइ धुंकूगु दु । तर दिक्कया खं, थथे भयभयबीक मुलु तयेत नं थाय मदु ला थें जुइ धुंकूगु चीधंगु नेपा गालय आ संसदय निगुगू तधंगु दल जयुाचोंगु नेकपा एमालें स्थानीय चुनावया घोषणापत्रय ”थगु सरकार बने जूगु निदँया दुने नेपाया राजधानी दुगु सोनिगया यें, यल व ख्वप जिल्लायात ल्वाकछ्याना मेघा नगर घोषणा यायेगु” गुरुयोजना न्ह्योने हगु दु । लिसें नेकपा माओवादी केन्द्र व नेपाली कांगेस्रया संयुक्त सरकारं नं नकतिनि पारित यागु २०७४ र २०७५ या बजेटय नं ”वइगु आर्थिक दँया शहरी पूर्वाधार विकास कार्यक्रमतयत अझ अपो प्राथमिकता बीगु” घोषणाया लिसें सोनिगलय छगू मेगा शहर दयेकेगु लगायत सोनिग दुने थीथी थासय पेंगू स्याटेलाइट शहर अर्थात न्हूगु उपग्रह शहरत दयेकेगु घोषणा समेत यागु खनेदु । स्याटेलाइट शहर दयेकेगु धासें सोनिगया डेढ लाख रोपनी जग्गाया बेचबिखन व कित्ता काटय समेत रोक तया बिउगु हालया अवस्थादु । थोयां बाहेक नं दोलंदो रोपनी जग्गा कघाना बाहिरी चक्रपथ दयेकेगु, छक्वलं आपालं गाडी ब्वांय वनीगु (मल्टी लेन) लं दयेकेगुनिसें सोनिगलय मोनोरेल व मेट्रोरेल न्ह्याकेगु थेंज्यागु शहरीकरणया आपालं महत्वाकांक्षी नारात बिया थनया पम्रखु राजनैतिक पार्टीत स्थानीय चुनावय वंगु व आया सरकारं नं अज्यागु हे योजनात दयेकाचोंगु खना नेपाया राजनीतिज्ञ, योजनाविद् फुक्क फुक्क हे गुगु दुनियाय दु धका थुइके हे मफुगु अवस्था थौंकन्हय जुयाचोंगु दु ।
मेगा शहरया छगू ग्यानापुगु मापदण्ड धइगु जनसंख्या छगू करोड सोयां चोय थेनीगु ख । विश्वय थौंकन्हय ३७ गू मेगा शहर दुगु व प्रत्येक मेगा शहरया जनसंख्या छगू करोड निसें स्वंगू करोडं चोय थेनाचोंगु तथ्यांक दु । उकिं सोनिगया स्वंगू शहर ल्वाकछ्याना मेगा शहर दयेकेगु गुरुयोजना धाथें हे लागू जुल धासा सोनिगया जनसंख्या छगू करोड सोयां चोय थेनेमागु अनिवार्य हे जू वनी । करोड जनसंख्या सोयां चोयया मेगा शहर जुइगुया अर्थ थो उपत्यकां नं स्वंगूगु विश्वया मेमेगु मेगा शहरतयसं भोगे यानाचोंगु अनेकन अकल्पनीय दर्दुशात भोगे यायेत बाध्य जू वनीगु नं ख ।
आ हे सोनिग पिनें निरन्तर दुहांवयाचोंगु अनियन्त्रित आप्रवासनया लिचोलं हाल ५० लाखया जख थेनाचोंगु जनसंख्यायात तकं मागु ल, धया निकास, डम्पिंग साइट, स्वास्थ्य उपचार, सरसफाइ, वायु व वातावरण प्रदुषण नियन्त्रण लगायत छुं हे मानवीय सुविधाया व्यवस्था यायेत बिलकुल असक्षम सरकारं थनया जनसंख्या अझ अपोयेका छगू करोड सोयां चोय थ्यंकल धासा थो सोनिगया हविगत छु जुइगु ख, कल्पना जक यायेत नं थाकुइ धुंकूगु दु ।
विश्वया मेमेगु देशया मेगा शहरत, विशेषत सोंगूगु विश्वया मेगा शहरतयगु खं ल्हायेगु खसा थो मेगा शहर धइगु छखे छपुच धनी वर्गया मनूत, नाफाखोर ब्यापारीतयसं दनातगु ततजागु महलतयगु केन्द्र, सपिंग मल, कल कारखानां जायाचोंगु, दुपिं मनूतयगु लागिं जक मोज मस्तिया केन्द्र जुयाचोंगु दु धासा मेखे गरिबी व अभावं ज्या मालेगु लागिं शहरय दुहांवयेत बाध्य जूपिं ग्रामिण भेगया निम्न व विपन्न वर्गया मनूतयगु भिड व उमिगु अस्तव्यस्त जीवन, झुपडपट्टिं जायाचोंगु अव्यवस्थित सुकुम्बासी बस्तित लिसें गरिबी व अभावया कारणं दयनीय जीवन हेनत बाध्य जुयाचोंपिं थोहे निम्न व विपन्न वर्गया मनूतयगु दर्दनाक बाखं व ब्यथा झीसं खंकेफु । महंगी, अभाव, भुखमरींनिसें भयंकर प्रदुषित वातावरणया नापनापं माफिया, आपराधिक पचु, गुण्डा व तस्करतयगु केन्द्रयारुपय समेत अज्यागु मेगा शहरतयत म्हसीकेगु यानाचोंगु दु ।
यदि थो मेगा शहर स्याटालाइट शहरया गुरु योजना साकार जुल धासा आप्रवासीत अझ तधंगु ल्याखय नेपागालय तनेगु ज्या जुया थन दुगु उब्जाउ भूमि नं सखाप जू वनीगु व थनया ल्यं दनिगु वाउंगु फांटत नं फुक्क हे सखाप जुया पूरा हे कुरुप कंक्रिट जंगलय परिणत जू वनीगु निश्चित दु । लिसें थौं सोयां नं अझ अपो धू, कुं, फोहर, ततजागु कंक्रिट महल, गाडी व गाडी वनीगु लंया लं जुया नेपागा प्रदुषित व स्वास्थ्यया दृष्टिं अति हे हानिकार व मनू हे चोने लायक मजुइगु थाय जू वनीगु नं निश्चित ख । उकिं थौंया ज्वलन्त न्ह्यस धइगु छाय माल मेगा सिटी व पेंगू पेंगूमछि मेगु न्हूगु स्याटेलाइट शहरत येँ सोनिगलय हे धइगु नं ख । छु सोनिगया फुक्क हे उर्बर भूमि कंक्रिटै कंक्रिटया छेँतयगु जंगल व मोटरै मोटर व ततबालागु लंतयसं हे जक जायेकेगु ख ला ? संघीयता लागू यायेु, विकेन्द्रीकरणया नारा बीगु तर सोनिगलं पिने तातापागु थासय विकास निर्माणया ज्याखंत छखे हे मोटरया लं छपु तकं मथेंकेंगु धयागु छु ? खालि सोनिग छगूयात जक केन्द्र दयेका योजनात दयेकेगु धइगु ला नेपाल देय न्यंकंया दक्वफुक्क स्वंगू करोड जनसंख्यायात सोनिग दुने हे क्वचिने वा धका प्रोत्साहित यायेगु ख धइथें नं जूवनी । थो धइगु नेपाया योजनाविद्तयगु पागलपनया पराकाष्ठा मख्सा मेगु छु ख ?
छखे सोनिगया भुखाचं तहसनहस व ध्वस्त जूगु शहर, गां बस्ति, पुलांगु सत, देग, विश्व सम्पदा स्थलत पुनर्निर्माण यायेत निदँ दयेधुंकलं नं राज्यपाखें खास छुं पहल याये फयाचोंगु मदुनि । मेखे सोनिग दुने व पिनेया गां थाय, शहर वस्तिइ गनं नं ल, शिक्षा, स्वास्थ्य, लंपु थें ज्यागु सामान्य मानवीय सुविधाया व्यवस्थाया लागिं पहल तक हे नं आ तकया सरकारतयसं यागु खने मदुनि । थनया थज्यागु अकर्मण्य सरकारतयसं छु उद्देश्यं सोनिगया स्वंगुलिं शहर ल्वाकछ्याना मेगा सिटीया अवधारणा हगु ख व सोनिग दुने हे मेगु न्हूगु पेंगू स्याटेलाइट नगर दयेकेगु धका अवधारणा हगु ख, आम जनता अजूचायाचोंगु दु ।
वास्तवय थज्यागु अविवेकी गुरु योजनायात नेपा सभ्यताया हे प्रतिकया रुपय दुगु काठमाण्डौं उपत्यकाया प्राचीन शहर, वस्ति, सभ्यता, सम्पदा नष्ट यायेगु व थनया आदिवासीया जनजीवन तहसनहस यायेगु भूमाफियातय चंगलुय फँसे जयुाचोंगु नेपा सरकारया अविवेकी, अदुरदर्शी एवं आपराधिक गुरु योजना ख धायेफु ।
स्थानीय जनताया सम्पत्ति लुटे याना विकासया नामय ययथे परियोजनात लागू यायेगु व सर्वसाधारण जनतायात उठिवास यायेगु ज्या संसारय गनं हे याइ मखु । उकिसनं संसारय अपो धइथें देशय अनया सरकारतयसं अन चोंपिं आदिवासी, मूलवासी, जाति, जनजातितयत उमिगु पुर्ख्यौली लागाय विशेष अधिकार बिया संरक्षण यायेगु नीति कयातगु दइ । सीमा स्वागु जलाखला देय भारतया हे जक दसु कायेगु खसां नं सिक्किमया आदिवासी भोटिया व लेप्चा जातिया जमिन मेपिं सुनांनं न्याये मी मदइगु कडा काननुी व्यवस्था यानातगु दु । अथे हे आसाम, झारखण्ड, पश्चिम बंगाल वा मेमेगु राज्यय नं अनया आदिवासी, मूलवासी, जाति, जनजातितयगु जग्गा जमिनया स्वामित्वयात मेपिं सुनां नं हनन याये मदइगु व न्याये मी मदइगु कानून अन दु । तर नेपालय धासा सोनिग दुने वा धाये मेमेगु लागाया स्थानीय मूलवासी, आदिवासी, जाति, जनजातिका जग्गा, जमिन, छेँ बुं लालाथे न्याये मी यायेत खुल्ला सुविधा दु । थुकिं याना सोनिगया मुलवासी, आदिवासी, जातित नेवा व तामांग वा धाये मेमेगु लागाय नं अनया आदिवासी जाति जनजातित थथगु मूल थासं तीव्र रुपं विस्थापन जुयाचोंगु दु । सोनिग दुने ला सरकार सोयम हे लगे जुया स्थानीय सर्वसाधारण जनताया छेँबुं बिना मुआब्जा हड्पे याना लालाथे लं तबाला याकेगु ज्या यानाचोंगु दुसा भूमाफितयत थ न्ह्यान्ह्याथे जग्गा प्लटिंग याना चांचां करोडपति, अर्बपति जुइत विशेष छुट हे बियातगु नं खनेदु ।
विडम्वना, विकासया नामय जुइगु फुक्क कथंया विकृति व विनासकारी कार्ययोजनातयत मिखा तिसिना समर्थन याइपिं सोनिगवासीत नं थन उलिहं हे दु । गुमिगु कारणं सोनिगया जनताया छेँ बुंइ लाथेपाथे बुल्डोजर चले याना आतंक मच्चे याना सोनिगयात मोटर व मोटरया लंपुतिं जक जायेकेगु सोइपिं कमिशनखोर अपराधी भूमाफियातयसं चले यानाचोंगु काठमाडौ उपत्यका विकास प्राधिकरणं सरकारयात मूर्ख दयेका पेंगू स्याटेलाइट शहर तनेगु गूरु योजना पास याकेत सफल जूगु दु । दुःखया खं सर्वसाधारण जनताया छेँ बुं थायबाय लाकाकया अमिगु थासं पितिनाछोया मोटर वनीगु ततब्यागु लं दयेका काठमाडौ उपत्यका विकास प्राधिकरणं यानाचोंगु अमानवीय हर्कत पनते न राज्य न गुगुं राजनैतिक पार्टी वा न सुं राजनेता हे न्ह्योने वगु खनेदत । सर्वसाधारण जनतायात बिचल्लि याना थुमिसं विकासया गज्यागु नमूना पेश यायेत्यंगु ख थुइकां थुइके मफइगु खं जूगु दु ।
थज्यागु अदुरदर्शी गुरु योजना हये सिबें न्ह्यो नेपाया राजनैतिक पार्टीत लिसें मेगा सिटी व स्याटेलाइट सिटीया म्हगस खंका मख्ख जुयाचोंपिं नेपाया अविवेकी विकासवादीतयसं विश्वया मेमेगु देशया मेगा सिटीतयसं भोगे यानाचोंगु बिजोग व दर्दुशात नं भचा अध्ययन यासा बांलाइगु ख । तर नेपाल सभ्यताया प्रतिक नेपाल देशया गौरव जुयाचोंगु सोनिगया कला, संस्कृति, इतिहास व सम्पदायात भताभंगु याइगु मेगा शहर व स्याटलोइट शहरत दयेकेगु खतरनाक गुरुयाजेना गुगुं हालतय नं लागू याके मबीत सवर्साधारण नेपाली जनता धासा सचते व जागरुक मजुसें मगागु अवस्था वयाचोगुं दु ।
ने.सं. ११३७ गुंलाथो ४ विहीवा
suurce thimi times k k manandhar
